یاساق آرزولار

یاساق آرزولار

دوکتور جئری

اوستاد دفترینین کیتاب ائوینده اوتورموشدوق. دانیشیقلار آراسیندا، دریندن بیر سولوق آلاراق دئدیم:

- صاباح، اسفندین ایکیسی، دونیالیق آنادیلی گونودور. کئشگه بیر سالون اولایدی ییغیشاردیق بو گونو قوتلایاردیق.

بو آندا قاپی آچیلیب ایکی "آدی یوخ" برادر ایچری گیردی:

- اؤلکهنین میللی گوونلیگی تهلوکهیه دوشمهسین دئیه سیزدن ایستهییریک صاباح هر چئشید ییغینجاقدان چکینهسینیز!

اوستاد دفتری چاش-باش منیم اوزومه باخدی:

- رحتملیک موللا نصرالدین دئمیشلی، آدی یوخ برادرلر بیزیم آرزولاریمیزین ایگینی* ده آلیرلار!

* ایشارهدیر موللا نصرالدینین بو حئکایهسینه:

موللا ائوده اگلشمیشدی. اورگیندن گئچدی: بیر کاسا آش اولسایدی چوخ یاخشی اولاردی. بو آندا قاپی چالیندی. گئتدی گؤردو، قونوشون قیزیدیر. الیندهکی کاسانین موللایا اوزاداراق دئییر: آنام خستهدیر، سیز آش پیشیرمیشسینیزسه بیر کاسا دا بیزه وئرین. موللا اؤز-اؤزونه دئدی: بیزیم قونشولار آرزولاریمیزین ایگین آلیرلار!